काठमाडौं । यस वर्ष चैत महिनामा मात्रै देशका २३ स्थानमा बर्डफ्लु संक्रमण पुष्टि भएको छ। पशु सेवा विभागका महानिर्देशक डा. उमेश दाहालका अनुसार सुनसरीमा १२, मोरङमा ७, झापामा २, चितवनमा १ र काठमाडौंमा १ स्थानमा संक्रमण देखिएको हो।
यस वर्ष पहिलो पटक चैत ६ गते मोरङको सुन्दरहरैचा र उर्लाबारीमा संक्रमण देखिएपछि रोग तीव्र रूपमा फैलिएको जनाइएको छ। संक्रमण नियन्त्रणका लागि १ लाख ४ हजारभन्दा बढी कुखुरा तथा हाँस नष्ट गरिएको छ।
काठमाडौंको त्रिभुवन विश्वविद्यालय परिसरका कागमा समेत बर्डफ्लु पुष्टि भएको छ। सुनसरी, झापा र मोरङमा पशुपक्षी ओसारपसारमा प्रतिबन्ध लगाइएको विभागले जनाएको छ। प्रभावित क्षेत्रमा आकस्मिक रोग अन्वेषण टोली परिचालन गरी नियन्त्रण अभियान चलाइएको छ।
सरकारले प्रभावित किसानलाई ७५ प्रतिशत क्षतिपूर्ति उपलब्ध गराउने व्यवस्था गरेको छ।
