काठमाडौँ । विश्व क्रिकेटमा हालसम्म ७६ जना खेलाडीले एक सय वा त्योभन्दा बढी टेस्ट प्रतियोगिता खेलिसकेका छन् । तर, यसै साता यो सूचीमा चारजना खेलाडी थपिने भएका छन् । त्यसपछि एक सय टेस्ट खेल्ने क्रिकेटरको सङ्ख्या ८० पुग्नेछ ।
घरेलु टोली भारत र इङ्ल्यान्डबिच आगामी बिहीबार धर्मशालामा पाँचौँ टेस्ट सुरु हुँदैछ । उक्त टेस्ट भारतका रवीचन्द्रन आश्विन र इङ्ल्यान्डका जोनी ब्रेस्टोका लागि एक सयौँ टेस्ट हुनेछ । यी दुवै खेलाडीले हालसम्म ९९ टेस्ट खेलिसकेका छन् ।
त्यसको एक दिनपछि नै न्युजिल्यान्ड र अस्ट्रेलियाबिच क्राइस्टचर्चमा दोस्रो टेस्ट क्रिकेट सुरु हुँदैछ । त्यो टेस्ट न्युजिल्यान्डका लागि दुई खेलाडी टिम साउथी र केन विलियम्सनका लागि एक सयौँ टेस्ट हुनेछ । यी दुवै खेलाडीले हालसम्म ९९ टेस्ट खेलिसकेका छन् ।
एक सय टेस्ट खेलिसकेका केही खेलाडीले बनाएका रोचक कीर्तिमानको विषयमा यहाँ चर्चा गर्न खोजिएको हो । आफ्नो एक सय टेस्ट खेल्दासम्म पाँच सयभन्दा बढी विकेट लिने बलरको सूचीमा श्रीलङ्काका मुथैया मुरलिथरन पहिलो स्थानमा स्थानमा छन् ।
एक सय टेस्ट खेल्दा मुरलिथरनले पाँच सय ९३ विकेट लिइसकेका थिए । सय खेल खेल्नुअघि नै उनले ४९ टेस्टमा पाँच विकेट र १४ टेस्टमा १० विकेट लिएका थिए । समग्रमा भने मुरलिथरनले एक सय ३३ टेस्ट खेल्दै कुल आठ सय विकेट लिएका थिए ।
मुरलिथरनबाहेक एक सय टेस्ट खेल्नुअघि नै पाँच सयभन्दा बढी विकेट लिने दोस्रो खेलाडी हुन, भारतका आश्विन । उनले हालसम्म ९९ टेस्ट खेल्दै पाँच सय सात विकेट लिइसकेका छन् । उनले ३५ टेस्टमा पाँच विकेट र आठ टेस्टमा १० विकेट लिइसकेका छन् । बिहीबार सुरु हुने खेल उनका लागि एक सयौँ टेस्ट हुनेछ ।
यसैगरी एक सय टेस्ट खेल्दासम्म सबैभन्दा बढी रन बनाउने ब्याट्सम्यान अस्ट्रेलियाका स्टिभन स्मिथ हुन् । स्मिथले एक सय टेस्ट खेल्दासम्म ५८.९५ को औसतले कुल नौ हजार एक सय ३७ रन बनाएका थिए । यस क्रममा उनले ३२ शतक प्रहार गरेका थिए । समग्रमा भने स्मिथले एक सय आठ टेस्ट खेल्दै ५७.५२ को औसतले कुल नौ हजार ६ सय ६५ रन बनाइसकेका छन् । उनले हालसम्म ३२ शतक र ४१ अर्धशतक प्रहार गरेका छन् ।
आफ्नो खेलजीवनको एक सयौँ टेस्टमा सहभागिता जनाउन लागेको विलियम्सले पनि स्मिथलाई पछ्याउँदै छन् । ३३ वर्षीय विलिम्सनले ९९ टेस्टमै ३२ शतक पुरा गरिसकेका छन् । उनले ३३ अर्धशतक पनि बनाएका छन् । विलियम्सनले हालसम्म ५५.२५ को औसतले कुल आठ हजार ६ सय ७५ रन बनाइसकेका छन् ।
एक सय टेस्ट खेल्ने खेलाडीमध्ये न्युजिल्यान्डका ब्रेन्डन म्याककुलम मात्र यस्ता खेलाडी हुन् जसले टेस्ट क्रिकेटमा ‘डेब्यू’ गरेदेखि एक सय टेस्ट खेल्दासम्म हरेक खेलमा सहभागिता जनाए । यसबिचमा देशले खेलेका हरेक टेस्ट प्रतियोगितामा उनी टोलीमा थिए ।
विश्व टेस्ट क्रिकेटमा म्याककुलमका अतिरिक्त अन्य पाँच खेलाडी यस्ता छन्, जसले टेस्ट क्रिकेटमा ‘डेब्यू’ गरेदेखि एक सय टेस्ट खेल्दासम्म बिचमा एक खेल गुमाएका थिए । एलन बोर्डर, एलिस्टर कुक र कपिल देव पनि यो सूचीमा पर्छन् । सन् १९८४ मा कोलकातामा खेलिएको इङ्ल्यान्डविरुद्धको टेस्टमा कपिल देबलाई रहश्यमयी तरिकाले टोलीमा समावेश गरिएको थिएन । अन्यता कपिल देव पनि म्याककुलमकै सूचीमा पर्ने थिए ।
यसैगरी टेस्ट क्रिकेटमा ‘डेब्यू’ गरेको सबैभन्दा कम समयमा एक सयौँ टेस्ट खेल्ने खेलाडी इङ्ल्यान्डका एलिस्टर कुक हुन् । उनले टेस्ट क्रिकेटमा ‘डेब्यू’ गरेको सात वर्ष दुई सय ८७ दिनपछि नै एक सयौँ टेस्ट खेलेका थिए । टेस्ट क्रिकेटमा ‘डेब्यू’ गरेको सबैभन्दा लामो समयपछि एक सयौँ टेस्ट खेल्ने खेलाडी भने ग्राहम गुच हुन् । उनले ‘डेब्यू’ टेस्ट खेलेको १७ वर्ष दुई सय तीन दिनपछि एक सयौँ टेस्ट खेलेका थिए ।
यसैगरी सन् २००६ मा सेन्चुरियनमा भएको दक्षिण अफ्रिका र न्युजिल्यान्डबिचको टेस्टमा एकैपटक तीनजना खेलाडीले आफ्नो एक सयौँ टेस्ट खेलेका थिए । विश्व टेस्ट क्रिकेटको इतिहासमा एउटै खेलमा तीन खेलाडीले आफ्नो एक सयौँ टेस्ट खेलेको त्यो एकमात्र अवसर थियो । उक्त टेस्टमा ज्याक कालिस, सन पोलक र स्टेफन फ्लेमिङले एक सयौँ टेस्ट खेलेका थिए ।
हालसम्म इङ्ल्यान्डका १६ जना खेलाडीले एक सय टेस्ट खेलिसकेका छन् । जोनी ब्रेस्टो एक सय टेस्ट खेल्ने इङ्ल्यान्डका १७औँ खेलाडी बन्नेछन् । अन्य कुनै पनि राष्ट्रका यति धेरै खेलाडीले एक सय वा त्योभन्दा बढी टेस्ट खेलेका छैनन् ।
यसैगरी अस्ट्रेलियाका १५ र भारतका १४ जना खेलाडीले हालसम्म एक सय वा त्योभन्दा बढी टेस्ट खेलेका छन् । पाकिस्तानका पाँचजना खेलाडीले मात्र हालसम्म एक सय टेस्ट खेलेका छन् । यो सबैभन्दा कम सङ्ख्या हो ।
हालसम्म तीनजना बलरले आफ्नो एक सयौँ टेस्टमा पाँच वा त्योभन्दा बढी विकेट लिएका छन् । यस्तो उपलब्धि हासिल गर्ने बलर शेन वार्न, मुथैया मुरलिथरन र अनिल कुम्बले हुन् । वार्नले सन् २००२ मा खेलिएको दक्षिण अफ्रिकाविरुद्धको आफ्नो एक सयौँ टेस्टमा यस्तो सफलता हात पारेका थिए ।
यसैगरी मुरलिथरनले सन् २००६ मा खेलिएको बंगलादेशविरुद्धको आफ्नो एक सयौँ टेस्टमा र अनिल कुम्बलेले सन् २००५ मा खेलिएको श्रीलंकाविरुद्धको आफ्नो एक सयौँ टेस्टमा पाँच वा त्योभन्दा बढी विकेट लिएका थिए ।
स्रोत :रातोपाटी
