दिपक बहादुर विश्वकर्मा
दुर्गौली। जानकी गाउँपालिकाले कृषि उत्पादनमा सुधार ल्याउने उद्देश्यसहित २ सय ६२ जना किसानलाई निःशुल्क सूक्ष्म तत्व वितरण गरेको छ।
गाउँपालिकाको कृषि विकास शाखाले वैशाख ३१ र जेठ १ गते सञ्चालन गरेको माटो परीक्षण शिविरमा सहभागी भएका किसानहरूको माटो परीक्षणपछि आवश्यक पोषक तत्वहरूको अभाव देखिएको थियो। सोही आधारमा किसानहरूलाई जिंक, पोटास, फस्फोरस र नाइट्रोजनजस्ता आवश्यक सूक्ष्म तत्वहरू वितरण गरिएको हो।
दिईएको जानकारी अनुसार माटोमा पोषणको अभावका कारण उत्पादनमा गिरावट देखिएकाले त्यस्तो कमी पूर्ति गर्न सूक्ष्म तत्वको वितरण गरिएको हो। वितरण कार्यक्रम जानकी गाउँपालिका अध्यक्ष गणेश चौधरी र उपाध्यक्ष लालमति कठरियाको संयुक्त उपस्थितिमा सम्पन्न गरिएको थियो।
गाउँपालिकाले आगामी दिनमा पनि माटोको गुणस्तर सुधार, वैज्ञानिक खेती प्रवर्द्धन र उत्पादन वृद्धि गर्न यस्ता कार्यक्रम निरन्तर सञ्चालन गर्ने बताएको छ।
यस कार्यक्रमबाट किसानहरू उत्साहित भएका छन् भने कृषि क्षेत्रको दिगो विकासतर्फ सकारात्मक संकेत देखिएको स्थानीय कृषकहरूले बताएका छन्।
