दिपक बहादुर विश्वकर्मा
कैलाली। जानकी गाउँपालिका वडा नं. तिन स्थित बालमुक्ति आधारभूत विद्यालय, लायकपुरले शैक्षिक सामग्री प्राप्त गरेको छ। गाउँपालिका अध्यक्ष गणेश चौधरीले विद्यालयका प्रधानाध्यापक नन्दराज उपाध्यायलाई सामग्रीहरू हस्तान्तरण गर्नुभयो।
उक्त सामग्रीहरू बाल कल्याण संघद्वारा सञ्चालित ‘बाल समृद्धि कार्यक्रम’ अन्तर्गत ट्रान्सफार्म एड इन्टरनेशनलको सहयोगमा प्रदान गरिएको हो। विद्यालयमा आयोजित सानो समारोहबीच सामग्री हस्तान्तरण गरिएको हो।
समारोहमा प्रमुख अतिथि अध्यक्ष चौधरीले बालमैत्री शिक्षाको प्रवर्द्धन गर्न गाउँपालिकाले निरन्तर सहयोग गर्दै आएको बताउँदै आगामी दिनमा अझ प्रभावकारी कार्यक्रममार्फत साथ दिने प्रतिबद्धता जनाउनुभयो। प्रधानाध्यापक उपाध्यायले पठनपाठनमा सहजता ल्याउन सामग्रीले सहयोग पुग्ने विश्वास व्यक्त गर्दै सहयोगदाताप्रति आभार प्रकट गर्नुभयो।
बाल समृद्धि कार्यक्रम ग्रामीण भेगका बालबालिकाको समग्र विकास र गुणस्तरीय शिक्षामा पहुँच सुनिश्चित गर्ने उद्देश्यले सञ्चालित रहेको छ।
