दिपक बहादुर विश्वकर्मा
डोटी । डोटीको बडिकेदारस्थित विपिनगरमा सम्पन्न १५औँ जिल्ला स्तरीय राष्ट्रपति रनिङ शिल्ड प्रतियोगिता–२०८१ मा बोगटान फुड्सिल गाउँपालिकाका विद्यार्थीहरूले उल्लेखनीय सफलता हात पारेका छन्।
फागुन १७ देखि १९ गतेसम्म सञ्चालन भएको प्रतियोगितामा गाउँपालिका अन्तर्गतका विभिन्न विद्यालयहरूबाट सहभागी भएका विद्यार्थीहरूले कुल ७ पदक जित्दै बोगटानको नाम चम्काएका हुन्। उनीहरूले ४ स्वर्ण, २ रजत र १ कांस्य पदक प्राप्त गरेका छन्।
पदक विजेता खेलाडीहरूमा श्री खत्याडी माविबाट ३ जना, श्री जोराघाट माविबाट २ जना र श्री भगवतेश्वर माविबाट १ जना विद्यार्थी रहेका छन्।
खेलकुदमा विद्यार्थीहरूको रुचि र प्रदर्शनलाई उत्साहजनक मान्दै बोगटान फुड्सिल गाउँपालिकाले विजयी खेलाडीहरूलाई प्रमाणपत्र, खादा र नगद पुरस्कारसहित सम्मान गरेको छ।
सम्मान कार्यक्रममा गाउँपालिका अध्यक्ष, उपाध्यक्ष, कार्यपालिका सदस्यहरू तथा सम्पूर्ण गाउँसभा सदस्यहरूको उपस्थिति रहेको थियो। गाउँपालिकाले आगामी दिनमा खेलकुदलाई अझ प्राथमिकतामा राख्ने प्रतिबद्धता पनि जनाएको छ।
