दिपक बहादुर विश्वकर्मा
दुर्गाैली।“धान बालीमा सघनता, खाद्य सुरक्षा र आत्मनिर्भरता” भन्ने नारासहित जानकी गाउँपालिकामा २२ औं राष्ट्रिय धान दिवस तथा रोपाइँ महोत्सव भव्य रूपमा मनाइएको छ।
गाउँपालिकाको वडा नं. ४ अन्तर्गत बेलपुरमा आयोजित कार्यक्रममा परम्परागत शैलीमा धान रोपाइँ गरी दही–चिउरा खाएर असार १५ को विशेषता झल्काइएको थियो।
कार्यक्रममा गाउँपालिका अध्यक्ष गणेश चौधरी, उपाध्यक्ष लालमती कठरिया, वडा नं. ७ का वडा अध्यक्ष कमल महतो, कार्यपालिका सदस्यहरू, पालिकाका कर्मचारी तथा स्थानीयवासीहरूको उल्लेखनीय सहभागिता रहेको थियो।
कृषिमा आत्मनिर्भरता, खाद्य सुरक्षा तथा धान बालीको सघन उत्पादनलाई प्रवर्द्धन गर्ने उद्देश्यले मनाइने यो दिवसले कृषकहरूलाई सम्मान गर्ने र कृषि क्षेत्रको महत्त्वलाई उजागर गर्ने अवसर प्रदान गरेको सहभागीहरूले बताएका छन्।
