धनगढी । सुदूरपश्चिम प्रदेश सरकारको आर्थिक वर्ष २०८२/८३ का लागि प्रस्तुत गरिएको बजेटमाथि आजबाट औपचारिक छलफल सुरु हुँदैछ। प्रदेश सभामा बजेट प्रस्तुत भएको तीन सातापछि छलफल सुरु हुन लागेको हो।
प्रदेश सभा सचिवालयका अनुसार आज (आइतबार) दिउँसो ४ बजे सभा बस्नेछ। सभामुख भीमबहादुर भण्डारीले जानकारी दिएअनुसार यही असार १ गते आर्थिक मामिला तथा योजना मन्त्री बहादुरसिंह थापाले ३३ अर्ब ४७ करोड ६० लाख ४८ हजार रुपैयाँको बजेट प्रस्तुत गरेका थिए।
आजबाट सुरु हुने छलफल तीन दिनसम्म चल्नेछ। कार्यव्यवस्था परामर्श समितिको निर्णयअनुसार असार १७ गतेसम्म बजेट पारित गर्ने तयारी गरिएको छ। बजेटमाथिको छलफलका क्रममा सांसदहरूले बजेटको प्राथमिकता, वितरण र प्रभावकारिताबारे प्रश्न उठाउने र सुझाव दिने अपेक्षा गरिएको छ।
संसदीय परम्परा अनुसार, छलफलपछि बजेट पारित गर्ने प्रक्रिया अघि बढाइनेछ। विपक्षी दलहरू बजेटमा समानुपातिक वितरण र विकासको सन्तुलनमा प्रश्न उठाउने तयारीमा छन् भने सत्ता पक्षले बजेटलाई समावेशी, दिगो र विकासमुखी भन्दै बचाउ गर्ने देखिएको छ।
