धनगढी । सुदूरपश्चिम प्रदेशका उद्योग, पर्यटन, वन तथा वातावरण मन्त्री रामेश्वर चौधरीको बर्खास्तीपछि नागरिक उन्मुक्ति पार्टी (नाउपा) सुदूरपश्चिम प्रदेश संसदीय दलको आकस्मिक बैठक आज बस्ने भएको छ।
मुख्यमन्त्री कमल बहादुर शाहले मन्त्री चौधरीलाई पदमुक्त गरेपछि उत्पन्न परिस्थितिबारे छलफल गर्न नाउपाले शुक्रबार बिहान १० बजे संसदीय दलको कार्यालयमा बैठक बोलाएको हो। संसदीय दलका नेता घनश्याम चौधरीका अनुसार, बैठकले सरकारसम्बन्धी महत्वपूर्ण निर्णय लिने तयारी गरेको छ।
“मुख्यमन्त्रीज्यूले मन्त्रीज्यूलाई हटाएपछि हामीले बैठक आह्वान गरेका हौँ,” नेता चौधरीले भने, “सरकारबारे बैठकमा निर्णय हुन्छ।”
यसअघि पार्टीकी केन्द्रीय अध्यक्ष रञ्जिता श्रेष्ठले बिहीबारै संघ र प्रदेश सरकारबाट पार्टी अलग हुने घोषणा गरेकी थिइन्। प्रदेश संसदीय दल पनि सोही निर्णयको तयारीमा जुटेको जनाइएको छ। यद्यपि, केन्द्रीय समितिबाट आधिकारिक पत्र भने अझै संसदीय दलमा आएको छैन।
हाल सुदूरपश्चिममा नेपाली कांग्रेसको नेतृत्वमा एमाले र नागरिक उन्मुक्तिको संयुक्त सरकार सञ्चालनमा छ। प्रदेश सभामा कांग्रेसका १८, एमालेका ११ र नागरिक उन्मुक्तिका ७ जना सांसद छन्। नागरिक उन्मुक्तिले समर्थन फिर्ता लिए पनि सरकार अल्पमतमा नपर्ने अंकगणितीय अवस्था रहेको छ।
