भरत दास
अत्तरिया । सरकारले चालु आर्थिक वर्षको बजेटमा सुनचाँदीका गहनामा लगाएको २ प्रतिशत ‘विलासिता कर’ फिर्ता लिन माग गर्दै कैलाली र कञ्चनपुरका सुनचाँदी व्यवसायीहरूले अत्तरियामा प्रदर्शन गरेका छन्।
शनिवार भएको विरोध कार्यक्रममा व्यवसायीहरूले ‘सुनचाँदीमा लगाइएको विलासिता कर खारेज गर’, ‘हामी विरोधमा छौँ’, ‘उपभोक्ता, कालिगड तथा व्यवसायीमैत्री ऐन तुरुन्त जारी गर’, ‘उपभोक्ता अधिकार सुनिश्चित गर’ लगायतका नारासहित प्लेकार्ड बोकेर प्रदर्शन गरेका थिए।
सुनचाँदी व्यवसायी संघका सुदूरपश्चिम प्रदेश प्रवक्ता रूपक सुनारले सरकारले बजेटमार्फत् लादेको विलासिता करले व्यवसाय थप सङ्कटमा परेको बताए। “विलासिता करले व्यवसायी मात्रै होइन, उपभोक्ता पनि मारमा परेका छन्,” उनले भने, “यो व्यवस्था खारेज नभएसम्म देशभर आन्दोलन जारी रहनेछ।”
उनका अनुसार विगत एक महिनादेखि देशैभरका सुनचाँदी व्यवसायीहरू चरणबद्ध आन्दोलनमा छन्। संघीय सरकारले तुरुन्तै व्यवसायी, उपभोक्ता र कालिगडमैत्री नीति ल्याउनुपर्ने माग पनि व्यवसायीहरूको रहेको छ।
सुनचाँदी व्यवसायीहरूले आन्दोलनलाई अझ सशक्त बनाउने चेतावनी दिँदै आगामी दिनमा संघर्षका थप कार्यक्रम सार्वजनिक गर्ने बताएका छन्।
