धनगढी । नेपाल पत्रकार महासंघ कैलाली शाखाले मानसिक रोगसम्बन्धी सचेतनामूलक कार्यक्रम सम्पन्न गरेको छ।
सामाजिक विकास मन्त्रालयको सहयोगमा आयोजित उक्त कार्यक्रम आज धनगढीमा सम्पन्न भएको हो। कार्यक्रममा वरिष्ठ मानसिक रोग विशेषज्ञ डा. रामप्रसाद लामिछानेले मानसिक रोगका समस्या, लक्षण र उपचार विधिबारे विस्तृत जानकारी प्रस्तुत गरे।
उनका अनुसार मानसिक रोगको प्रमुख कारणमध्ये रक्सी र लागूपदार्थको सेवन पनि एक हो। “विश्व स्वास्थ्य संगठनको तथ्यांकअनुसार हरेक चार जनामध्ये एक जनामा मानसिक समस्या देखिने गरेको छ,” डा. लामिछानेले बताए।
बालकदेखि वृद्धसम्म सबै उमेर समूहमा मानसिक रोग देखिन सक्ने बताउँदै उनले तनाव व्यवस्थापन, खानपान तथा जीवनशैलीमा सुधार आवश्यक रहेको धारणा राखे।
कार्यक्रम नेपाल पत्रकार महासंघ कैलाली शाखाका अध्यक्ष श्रवण देउवाको अध्यक्षतामा सम्पन्न भएको थियो। सहजीकरण महासंघका सचिव तेजराज भट्टले गरेका थिए। कार्यक्रममा जिल्लाभरिका सञ्चारकर्मीहरूको उल्लेखनीय सहभागिता रहेको थियो।
