काठमाडौं । नेकपा माओवादी केन्द्रले नेत्रविक्रम चन्द ‘विप्लव’ नेतृत्वको नेपाल कम्युनिष्ट पार्टी (नेकपा) सँग पार्टी एकता गर्ने निर्णय गरेको छ। मंगलबार बसेको पार्टी स्थायी कमिटीको बैठकपछि पत्रकारहरूसँग कुराकानी गर्दै माओवादी केन्द्रका उपाध्यक्ष एवं प्रवक्ता अग्नि सापकोटाले एकता प्रक्रिया अघि बढाउने निर्णय भएको जानकारी दिएका हुन्।
सापकोटाका अनुसार अब दुबै पार्टीबीच एकता सम्बन्धी छलफल अघि बढाउन वार्ता टोली गठन गरिनेछ। “विप्लव नेतृत्वको नेकपासँग एकता गर्ने सहमति भएको छ,” उनले भने, “अब छिट्टै वार्ता टोली बनाएर छलफल सुरु गर्छौं।”
यस निर्णयलाई मुलुकमा वाम एकता प्रक्रियाको एक महत्वपूर्ण मोडको रूपमा हेरिएको छ। दुई पार्टीबीचको सम्भावित एकताले राष्ट्रिय राजनीतिमा नयाँ तरंग ल्याउने विश्लेषण गरिँदैछ।
