✍प्रकाश खड्का, टीकापुर
नेपाल अहिले गहिरो संकटको घडीमा छ। राजनीति अस्थिर छ, जनतामा असन्तोष छ, अर्थतन्त्र कमजोर छ, र भविष्यको बाटोबारे अन्योल छ। यस्तो कठिन समयमा समाधान खोज्नु प्रत्येक नेपालीको साझा जिम्मेवारी हो। म व्यक्तिगत रूपमा विश्वास गर्छु कि यसको उत्तर हाम्रो संविधानमै छ। संविधान हाम्रो साझा सम्झौता हो, जसले हरेक समस्याको वैधानिक र शान्तिपूर्ण बाटो देखाउँछ।
हालैको Gen-Z आन्दोलनले देशभरि ठूलो सन्देश दियो। युवापुस्ताले उठाएका मुद्दा—भ्रष्टाचारको अन्त्य, बेरोजगारीको समाधान, सुशासन र समानताको माग—यथार्थमा देशको मुटुको आवाज हुन्। यो आन्दोलनले देखायो कि अबको पुस्ता सचेत छ, परिवर्तन चाहन्छ, र देशलाई नयाँ दिशामा लैजान सक्ने क्षमता राख्छ। युवाको यही चेतनाले मलाई आशा दिलाउँछ।
तर दुःखको कुरा के हो भने, आन्दोलनको क्रममा केही अशुद्ध तत्व घुसपैठ गरेर हिंसा फैलाउन उद्यत भए। कतिपय स्थानमा सरकारी र निजी सम्पत्तिमा आगजनी भयो, तोडफोड गरियो, डर र अराजकता फैलियो। यस्तो कार्यले आन्दोलनको मूल उद्देश्यलाई कमजोर बनायो र जनताको समर्थन घटायो। यसमा राजनीतिक स्वार्थ, सुरक्षाको कमजोरी र प्रशासनको ढिलासुस्तीले पनि ठूलो भूमिका खेलेको देखिन्छ।
अब प्रश्न उठ्छ—के हामी केवल हेरेर बस्ने? देशलाई अराजकतामा धकेल्न दिनु नै राष्ट्रघात हो। समयमै निर्णय नगरेर ढिलाइ गर्नु घातक बन्न सक्छ। यस्तो अवस्थामा संविधानको मर्म बुझ्न र त्यसअनुसार अघि बढ्न हामी सबैले जोड दिनुपर्छ।
संविधानमा स्पष्ट रूपमा भनिएको छ कि संकटको बेला सरकार गठनको प्रक्रिया अपनाउनुपर्छ। तर अहिलेको अवस्था हेर्दा लाग्छ, नेतृत्व गुम्सिएको छ, राष्ट्रप्रमुख मौन छन्, र जनतामा विश्वास कम छ। यस्तो बेलामा देशलाई अगाडि बढाउन नयाँ र सक्षम नेतृत्वको आवश्यकता छ। मलाई लाग्छ, अब नेपालले त्यस्तो प्रधानमन्त्री पाउनुपर्छ जसको छवि स्वच्छ होस्, जसको नियुक्ति कानुनसम्मत र नैतिक होस्, जसले दलीय घेराभन्दा माथि उठेर सबैलाई एकतामा बाँध्न सकोस्। त्यो नेतृत्वले विदेशी चलखेलको सामना गर्न सक्ने स्वाभिमानी व्यक्तित्व बोकेको हुनुपर्छ र युवापुस्ताको आकांक्षा बुझ्न सक्ने चाहिँ अनिवार्य छ।
देशलाई बचाउन अब सत्ता जोगाउने खेल बन्द गर्नु अपरिहार्य छ। ढिलाइ नै ठूलो खतरा हो। विदेशी चलखेल र आन्तरिक विभाजनको जोखिम बढिरहेको छ। त्यसैले संविधानको मार्गदर्शन अनुसार नयाँ सरकार गठन गर्नु अत्यावश्यक छ।
यो आवाज केवल मेरो होइन; यो हाम्रा सबैको अस्तित्व र भविष्यको रक्षा गर्ने चेतावनी हो। देश बाँच्छ कि गुम्छ, त्यो अब हाम्रो सबैको निर्णयमा निर्भर छ। हरेक नागरिकले शान्त, संवैधानिक र विवेकपूर्ण बाटो रोज्नुपर्छ। संविधानलाई आधार बनाएर मात्रै देशलाई संकटबाट निकास दिन सकिन्छ।
