बझाङ । बझाङका धार्मिक गुरूहरू सामाजिक कुप्रथा र अन्धविश्वासका विरुद्धमा अगाडि बढेका छन् । गाउँ–गाउँमा अभियान चलाउँदै उनीहरूले घरेलु हिंसा, महिनावारी विभेद, बालविवाह, जातीय छुवाछुतलगायतका सामाजिक विकृतिजन्य कुरिती अन्त्यका लागि जनचेतना फैलाउने कार्य थालेका हुन् ।
शुक्रबारदेखि बुंगल नगरपालिका–६, ७, ९, १० र ११ मा ‘कुरिती र अन्धविश्वास विरुद्ध धार्मिक प्रवचन कार्यक्रम’ सुरु भएको छ । उक्त कार्यक्रममा हिन्दु धर्मगुरू संस्कार शिरोमणी ज्योतिषाचार्य पण्डित गणेशप्रसाद पन्त पञ्चांगकार र वैदिक पुरोहित सुरेश सनातनी आर्यले प्रवचन दिइरहेका छन् ।
प्रवचनका क्रममा पण्डित पन्तले वेद र गीतामा कुनै पनि विभेदजन्य व्यवहारको समर्थन नभएको स्पष्ट पारे । उनले भने, “धर्मले नभनेको कुरालाई अधार्मिक कुरा गरेर कुरितीको पछि लाग्नु गलत हो ।” उनले धर्म र विज्ञान दुवैको ज्ञान राख्ने व्यक्तिलाई नै ‘साँचो ज्ञानी’ मानेर विभेद होइन, समानताको अभ्यास गर्नुपर्ने बताए ।
महिनावारी विभेदका विषयमा उनले भने, “महिनावारी प्राकृतिक कुरा हो, अस्वस्थता होइन । त्यसलाई तिरस्कृत गर्नु पाप हो । हिन्दु धर्मले पनि महिनावारी भएकी महिलालाई तिरस्कार गर्नु हजारौँ ब्राह्मण र गाई मारे सरह पाप लाग्छ भनेको छ ।”
त्यस्तै, वैदिक पुरोहित सुरेश पार्की सनातनी आर्यले परम्परागत रूपमा प्रयोग हुने गहुँत, गोबर र सुनपानीलाई गलत अर्थ लगाएर ‘कुप्रथा’ का रूपमा प्रचार गरिएको बताए । उनका अनुसार, “गहुँत छर्कनु भनेको किटाणु नाश गर्नु हो । गाईको गोबर र सुनपानी प्राकृतिक सेनिटाइजर हुन् । त्यसको वैज्ञानिक कारण बुझ्न जरुरी छ, त्यसलाई जातीय विभेदसँग जोड्नु गलत हो ।”
समान व्यवहार परियोजना (EVE) अन्तर्गत युएमएन र दलित सहयोग समाजले संयुक्त रूपमा आयोजना गरेको यो प्रवचन कार्यक्रमको उद्देश्य धर्म र संस्कृतिमा आधारित सही व्याख्या प्रस्तुत गर्दै समाजमा रहेका हानिकारक प्रथालाई अन्त्य गर्नु रहेको छ ।
परियोजनाका फिल्ड अधिकृत भीम रसाइलीका अनुसार, “परम्परा र संस्कृतिका नाममा लुकेका विभेदजन्य व्यवहार र कुरिती विरुद्ध धार्मिक दृष्टिकोणबाट जनचेतना फैलाउने हाम्रो उद्देश्य हो ।”
राससबाट प्राप्त जानकारीअनुसार, यो अभियान बझाङका अन्य वडामा पनि विस्तार गर्ने तयारी भइरहेको छ ।
