धनगढी । सुदूरपश्चिमको अस्थायी राजधानी धनगढीमा पर्यटन फोटो पत्रकारितामुखी तीनदिने विशेष तालिम सुरु भएको छ। नेपाल पर्यटन बोर्ड (एनटीबी) र संयुक्त राष्ट्रसंघीय विकास कार्यक्रम (यूएनडीपी) सञ्चालित दिगो पर्यटन परियोजना (एसटीपी)को पहलमा आयोजना गरिएको यो तालिम राष्ट्रिय फोटो पत्रकार समूह नेपाल (एनएफपीजे) तथा नेपाल पत्रकार महासंघ कैलालीसँगको सहकार्यमा सञ्चालन भइरहेको हो।
सुदूरपश्चिमका नौवटै जिल्लाबाट झन्डै ३५ पत्रकार सहभागी भएको तालिमको उद्देश्य पर्यटन प्रवर्द्धनलाई दृश्यात्मक माध्यमबाट प्रभावकारी बनाउनु, स्थानीय आकर्षणको अभिलेखन मजबुत गर्नु र पर्यटन गतिविधिमा समुदायको सहभागिता बढाउनु रहेको आयोजकले जनाएको छ।
उद्घाटनमा नेपाल पत्रकार महासंघ सुदूरपश्चिम प्रदेशका अध्यक्ष भरत शाहले यो तालिम प्रदेशको पर्यटन अभियानका लागि ‘माइलस्टोन’ बन्ने टिप्पणी गरे। उनका अनुसार धार्मिक, सांस्कृतिक तथा प्राकृतिक सम्पदाले समृद्ध सुदूरपश्चिमलाई अघि बढाउन पत्रकारिताको भूमिका महत्वपूर्ण छ।
त्यस्तै, महासंघ कैलालीका अध्यक्ष श्रवण देउवाले मिडियाको गुणस्तर उकास्ने आधार नै क्षमता अभिवृद्धि भएकाले यस्ता तालिम अनिवार्य रहेको बताए। “सिपले नै समाचारको स्तर निर्धारण गर्छ,” उनले भने।
एनएफपीजेका अध्यक्ष प्रदीपराज वन्तले फोटो पत्रकारिता पर्यटन प्रवर्द्धनको आधारभूत खम्बा भएको बताउँदै, “एक उत्कृष्ट फोटोले गन्तव्यलाई विश्वभर परिचित गराउन सक्छ,” भने।
फील्ड अभ्यासका क्रममा सहभागीहरू शुक्लाफाँटा राष्ट्रिय निकुञ्ज पुगेका छन्, जहाँ उनीहरू जैविक विविधता, वन्यजन्तु, घाँसेमैदान र प्राकृतिक आकर्षणको अध्ययन गर्दै उच्चस्तरको फोटो–डोकुमेन्टेसन तयार गर्नेछन्।
पहिलो सत्रमा नेपाल पर्यटन बोर्डका सञ्चार परामर्शदाता दिलिप प्रकाश कार्कीले पर्यटन पत्रकारिताका मूल सिद्धान्त र सञ्चार रणनीतिबारे प्रशिक्षण दिएका थिए। उनका अनुसार पत्रकारले दीगो र उत्तरदायी पर्यटनलाई प्राथमिकतामा राखी सामग्री तयार गर्नुपर्नेछ।
फोटो पत्रकारहरू सुनिल चुडा बज्राचार्य, प्रकाशचन्द्र तिमिल्सेना र प्रदीपराज वन्तले फ्रेम निर्माणदेखि तस्बिरमा कथा भर्नेसम्मका विषयमा व्यावहारिक र सैद्धान्तिक कक्षा लिइरहेका छन्। तालिमको समन्वय एनएफपीजेका कोषाध्यक्ष प्रदीप श्रेष्ठले गरिरहेका छन्।
पहिलो संस्करण विराटनगरमा सम्पन्न भएको यो तालिमको तेस्रो संस्करण पोखरामा आयोजना हुने तयारी छ।
