दीपक बहादुर विश्वकर्मा
डोटी । नेकपा (एमाले) को ११औं राष्ट्रिय महाधिवेशनका लागि डोटीबाट ४० वर्षमुनिका युवामध्ये बम बहादुर बम सर्वसम्मत रूपमा प्रतिनिधि चयन भएका छन्। आइतबार सम्पन्न एमाले डोटीको प्रतिनिधि छनोट बैठकले ३८ वर्षीय युवा नेता बम बहादुर बमलाई महाधिवेशन प्रतिनिधिका रूपमा मनोनयन गरेको हो।
एमाले डोटी जिल्ला कमिटीका पूर्व सचिवालय सदस्य रहेका बम बहादुर बम नौौँ जिल्ला अधिवेशनमा उपसचिव पदमा प्रतिस्पर्धा गर्दा पराजित भए पनि युवामाझ भने लोकप्रिय नेताका रूपमा उभिएका छन्। उनी यसअघि १०औँ राष्ट्रिय महाधिवेशनमा समेत प्रतिनिधि भइसकेका छन्।
अनेरास्ववियुको विद्यार्थी राजनीतिबाट उदाएका बम बहादुर बम जिल्ला युवा समिति डोटीका पूर्व अध्यक्ष पनि हुन्। हालै मंसिर १० गते धनगढीमा राष्ट्रिय युवा संघले आयोजना गरेको कार्यक्रममा एमाले पोलिटब्यूरो सदस्य महेश बस्नेतलगायत नेताहरू उपस्थित हुँदा ‘जेनजी’ समूहका युवाहरूले गरेको नाराबाजी नियन्त्रण गर्न बमले निभाएको भूमिकाले उनी राजनीतिक वृत्तमा थप चर्चामा आएका छन्।
