गृहमन्त्री सुधन गुरुङले आइतबार गृह मन्त्रालयमा सुरक्षा निकायका उच्च अधिकारीहरूसँग झण्डै साढे पाँच घण्टा लामो गहन परामर्श गरेका छन्। साँझ ६ बजे सुरु भएको उक्त बैठक राति ११ बजेसम्म चलेको थियो।
छलफलमा गृहसचिव राजकुमार श्रेष्ठ, नेपाल प्रहरीका महानिरीक्षक (आईजीपी) दानबहादुर कार्की र काठमाडौँका प्रमुख जिल्ला अधिकारी (सीडीओ) ईश्वरराज पौडेल लगायतको उपस्थिति थियो। बैठकको ठोस विषयवस्तु औपचारिक रूपमा सार्वजनिक नगरिए तापनि केही ठूला प्रकरणका फाइलहरू खोल्ने र उच्च पदस्थ व्यक्तिहरूलाई कानुनी दायरामा ल्याउने तयारीस्वरूप यो बैठक बसेको स्रोतले दाबी गरेको छ।
मन्त्रालयबाट बाहिरिने क्रममा सञ्चारकर्मीले सोधेको ‘के ठूला व्यक्तिहरू पक्राउ पर्न लागेका हुन्?’ भन्ने प्रश्नमा गृहमन्त्री गुरुङले संक्षिप्त प्रतिक्रिया दिँदै ‘पछि भनौँला’ मात्र भने। सेयर प्रकरणमा आफूमाथि भइरहेको आलोचना र ‘मिडिया ट्रायल’ प्रति आक्रोश व्यक्त गर्दै उनले राज्यको स्रोत साधन दुरुपयोग गर्नेहरू विरुद्धको कारबाही नरोकिने चेतावनी समेत दिएका छन्।
यसैबीच, बैठक चलिरहँदा राष्ट्रिय स्वतन्त्र पार्टीका महामन्त्री कविन्द्र बुर्लाकोटी पनि मन्त्रालय पुगेका थिए। उनले भने आफू गोरखाको एक समस्याका विषयमा सीडीओलाई भेट्न आएको र गृहमन्त्री व्यस्त रहेकाले अन्य कर्मचारीसँग भेटेर फर्किएको बताएका छन्। उनले गृहमन्त्री आफ्नो ढङ्गले काममा सक्रिय रहेको समेत उल्लेख गरे।
